Jedes Täfeli het sis Dehei

U letschd Friti isch e Delegation vo Jumi (öpe 20 Nase!) uf Laufen im Basubiet ga luege, wies bide Ricolatäfeli dehei usgseht. Die heis de cheibe schön!

Zur Eröffnig vom nöie Chrütertröchnigszentrum hei d Gäscht u d Mitarbeiter vo Ricola dörfe cho schwelge. Für dä Event isch äxtra es grosses Partyzäut usem Bode gstampft worde. Zmitts ir Schafweid, aber die Schäfli hei ömu fröid gha a üs. Ah de verschidene Jumi-Büffet hets Jumi-Börger mit feiner Saubi, verschidenschti Salät u natürlich es riisigs Chäs- u Trocheffleischbüffet gä. Usserdäm het’s e Saftbar gä, wo d Nädu u d Fride gsungi Tränkli zäme gmischt hei. Was natürlich oh nid darf fähle, si die glungnige Dessärstatione. Im einte Egge hesch chönne es gluschtigs Vanille-Soft-Ice mit süesse Ricola Brösmeli ga hole u im angere Egge, hei di Basler einisch richtegi Ämmitalerruschtig übercho, e feine Meringue vo Bilge mit früscher Nidle vo Zäziwiu u derzue es Äbbeeri vo Gysistei – mmh, da louft mr trotz Znüni ds Wasser im Muu zäme.

Dank guete Überredigstkünst, vilicht oh emne versprochene Bier u chli flirte, hei mr no hurti dörfe ga d Nase dri ha i das nöie Tröchnigszentrum – u das mit dr Nase meini wortwörtlich! Fasch besser aus dr Gruch us em Riifigschäuer vou Chäs, het di tröchneti Münze gschmöckt, näbe dran no grad früsche Houller – wahnsinn! Merci für die persönlichi Füehrig a derä Steu!

Iz wotti aber nümme lenger wärde – dir dörft no chli i üsne biudlich festghautene Erinnerige schwelge u ds schöne nöie Lehmhuus chöit dr unger: http://www.ricola.com/de-ch/Uber-Ricola/Architektur/Krauterzentrum ga aluege.

U i säge – bis gly!

OLYMPUS DIGITAL CAMERA

 

OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA OLYMPUS DIGITAL CAMERA